طالب القرب

طالب القرب…

_أبو حسين طلب صداقتي عالفايسبوك

وأنا وافقت..

دخل عليّي عالماسينجر يسألني:

— شو اسمك يا حلوة

— اسمي ع صفحتي متل ما قرأته

— أنتِ ستّ عن جدّ أو رجُل

— قلّتلّو سيرتي الذاتيّة موجودة ع صفحتي وفيها كلّ المعلومات

—طيب أنتِ حقيقيّة أو افتراضيّة

— حقيقيّة صوري واضحة.

— يعني هيدي صورتك؟

— ايه صورتي

— انت مزوجة؟

— ايه مزوجة وعندي ولاد

— يعني مش مطلّقة

— لا

— طيب ومش ناوية تطلقي؟

— أكيد لا

— طيب شو بيشتغل زوجك؟

— موظّف

— يييييي حرام والله لويني قلبي عليكِ

— طيب ليكي شو بدي قلك الله محلّل بالشّرع أربعة ومحسوبك ما عندو غير ثلاثة..

أمانة.. أمانة بحلّفك بولادك بس تنوي تطلّقي خلّيني ببالك ما تنسيني بدّي كمّل الشّرع مثل ما الله مكمّلني بعقلاتي

وان شاء الله ما بتكوني إلّا من نصيبي

— بسّ أنا ما ناوية طلّق

— بلكي نويتِ يخلق الله ما لا تعلمون..

الأيام صعبة والاقتصاد منهار والجوع عالبواب

— وكيف أنت ناوي تتزوّج بعد بهيك ظروف؟

— محسوبك الله ساترها معه ما تحملي همّ كلّ مرا عندي مقعّدها بطابق وبعد في عندي طابق فاضي رح خلّيلك ياه

وعندي أراضي كثير وكلّها مزروعة.. وعندي حوالى ال 1000 واحد تحت أمرتي بأمرهم روحوا بيروحوا تعالوا بيجوا

حاكم مش محكوم ما بحمل لا همّ الغلا ولا ال عيب الشّوم

أنتِ طلقي وما عليكِ ما بتكوني إلّا مبسوطة ومرتاحة

— طيّب البناية ال عندك الطّابق فيها كبير؟

— ما عندي بناية

— هلق قلتلّي بعد عندك طابق؟

— إيه صحّ مزبوط عندي غرفة وحدة وفيها تخت بأربع طوابق.

— شوووووو؟!

والألف واحد تحت أمرتك شو؟

— ألف راس غنم عم ناكل من خيرهم وبكرا لمّا بتقوى المجاعة مناكل منهم.

الله لايوفّقه كنت بلّشت فكّر عن جدّ بالطّلاق.

عايدة قزحيّا

مشهد من “صبحيّة نسوان”

عايدة قزحيّا

ابتسامة عالماشي

رفعت للتصميم