حماتي مش حماتي.. دي أمي التانية”..
“حماتي مش حماتي.. دي أمي التانية”.. يمكن الجملة دي تكون مفتاح حكاية الاستقرار اللي عايشاها كندة علوش مع عمرو يوسف بعد 10 سنين جواز!
كندة قررت تحكي مؤخرًا عن تفاصيل من بيتها بعيدًا عن الأضواء، وكشفت إيه اللي مخلي علاقتها بعمرو مستمرة بكل الحب والتفاهم ده.
كندة قالت إن من أكتر الحاجات اللي بتعجبها في عمرو إنه بار بوالدته جدًا، وبيحرص يكلمها كل يوم ويطمن عليها، وده بالنسبة لها دليل على أصله وتربيته، وإن الراجل اللي بيحترم أمه ويقدرها بيكشف عن جانب مهم جدًا من شخصيته.
لكن المفاجأة الأجمل كانت كلامها عن حماتها، اللي أكدت إنها بتعتبرها زي أمها بالظبط، وإن علاقتهم قائمة على الحب والصداقة والاحترام، وبتحرص ترجع لها وتستشيرها في أمور كتير، من غير تدخلات تفسد علاقتهم.
وكندة كمان ما نسيتش تتكلم عن عمرو كأب، ووصفته بأنه أب «هائل»، لأنه مش مجرد أب موجود في البيت، لكنه بيشارك أولاده تفاصيل يومهم، ويلعب معاهم، ويوصلهم تدريباتهم، ويكون جزء حقيقي من حياتهم.
أما هي، فبتحاول توازن في تربية أولادها بين إنها تحميهم وتخاف عليهم، وفي نفس الوقت تديهم مساحة يعتمدوا فيها على نفسهم ويبنوا شخصياتهم.
يمكن سر الحكاية مش في عدد سنين الجواز، لكن في التفاصيل الصغيرة اللي بتحافظ على الحب.. بر الوالدين، واحترام الأهل، والشراكة الحقيقية في تربية الأولاد.
رفعت للتصميم
