الواسطة بتكسب” والكفاءة بتستنى! هل دي حقيقة في اختيار المدربين في مصر؟!
بقلم الناقد الرياضي: حسن ماجد !
الواسطة بتكسب.. والكفاءة بتستنى! هل دي حقيقة في اختيار المدربين في مصر؟!
⚽ في بلد مليانة مدربين حاصلين على رخص تدريبية وخبرات، بيجتهدوا ليل ونهار عشان يثبتوا نفسهم، لازم نسأل سؤال محدش يقدر يهرب منه:
هل المناصب الفنية في الكرة المصرية بتروح للأكفأ، ولا للأقرب من أصحاب القرار؟!
مدرب عنده علم وشهادات وطموح، لكنه مش لاقي فرصة يثبت نفسه.. وفي المقابل، مدرب تاني بيحصل على فرص متكررة!
يا ترى الفرق في الكفاءة؟ ولا في العلاقات؟!
إحنا مش بنتهم حد من غير دليل، ومش بنحارب مدرب لمجرد إنه نجح أو فشل.. لكن من حقنا نطالب بمعايير واضحة وشفافة لاختيار المدربين، بعيدًا عن المجاملات والمحسوبية.
المشكلة مش إن مدرب يفشل.. المشكلة إننا نفضل ندي الفرصة لنفس الأسماء، ونسيب كفاءات تانية خارج الحسابات!
والأخطر إن غياب العدالة في الفرص بيقتل الطموح، وبيخلي بعض المدربين يسألوا نفسهم: أتعب وأطور نفسي ليه، لو الفرصة مش هتيجي إلا من خلال العلاقات؟!
يا مسؤولي الكرة المصرية.. افتحوا الباب للمنافسة الحقيقية!
اعملوا معايير معلنة، قيّموا المدربين على علمهم وخبراتهم ونتائجهم وقدرتهم على تطوير اللاعبين، وسيبوا الملعب هو اللي يحكم.
لأن منصب المدير الفني مش هدية، ولا مكافأة، ولا مجاملة لصديق.. ده مسؤولية عن فريق وجمهور ومستقبل لاعبين.
والسؤال اللي محتاج إجابة واضحة: لو حطينا الكفاءة في كفة، والعلاقات في كفة تانية.. مين فيهم بيكسب عند اختيار المدربين في مصر؟!
كفاية كلام عن تطوير الكرة.. التطوير الحقيقي بيبدأ من عدالة الاختيار!
رفعت للتصميم
